უკანასკნელი დონი
 ნაწილი პირველი

პროლოგი

ქუოგი, 1965


სანტადიოს ოჯახის წინააღმდეგ დასრულებული დიდი ომის შემდეგ ერთი წელიწადი გასულიყო, როდესაც ბზობას დონ დომენიკო კლერიკუციომ სანათესავოში ორი ჩვილის ნათლობის აღსანიშნავი ზეიმი გამართა და თავის ცხოვრებაში უმნიშვნელოვანესი გადაწყვეტილებაც მიიღო. წვეულებაზე ამერიკის უდიდესი ოჯახების თავკაცები მიიპატიჟა, მათ შორის, ლას-ვეგასში სასტუმრო „ქსანადუს“ მფლობელი ალფრედ გრონეველტი და დევიდ რედფელო, რომელმაც აშშ-ში ვრცელი ნარკოიმპერია შექმნა. გარკვეულწილად, ორივე დონის პარტნიორი გახლდათ.

დონ კლერიკუციომ, ამჟამად ამერიკული მაფიის ყველაზე უფრო გავლენიანი ოჯახის უფროსმა, საკუთარი ძალაუფლების შეზღუდვა გადაწყვიტა, ცხადია - მხოლოდ ზედაპირულად. ახალი ხელის დარიგების დრო დადგა. აშკარა ძალაუფლება მეტისმეტად საშიში გახდა. თუმცა, თავის მხრივ, ძალაუფლების შეზღუდვაც საშიში იყო, ეს დიდი სიფრთხილითა და კეთილი ნების დემონსტრირებით უნდა განეხორციელებინა და თანაც, საკუთარ სამფლობელოში.

კლერიკუციოს მამული ქუოგში ფართობით ოც აკრს შეადგენდა, წითელი აგურის ათფუტიანი გალავნით იყო გარშემორტყმული და მავთულხლართითა და ელექტროსენსორებით დაცული. დონის რეზიდენციის გარდა, მის ტერიტორიაზე მისი სამი ვაჟის სახლები და ოჯახის ერთგული მსახურების ოცი მომცრო საცხოვრებელი იყო განლაგებული. 

სტუმრების მოსვლამდე დონი თავის ვაჟებთან ერთად სახლის უკან გაშენებულ ბაღში, რკინის თეთრ მაგიდასთან იჯდა. უფროსი, ჯორჯო, გამხდარი, წოწოლა ახალგაზრდა იყო, მკვეთრი შავი ულვაშით, ინგლისელ ჯენტლმენს წააგავდა და ამ მსგავსებას იმითაც უსვამდა ხაზს, რომ მუდამ საუკეთესო მკერავთან შეკერილი კოსტიუმი ეცვა. ოცდაშვიდი წლის იყო, პირქუში სახე და მწარე ენა ჰქონდა. დონმა ჯორჯოს აცნობა, რომ გზავნიდა სასწავლებლად უორტონის ბიზნესსკოლაში, სადაც კანონის დაურღვევლად ფულის მოპარვის ყველა ხრიკს შეასწავლიდნენ. 

ჯორჯოს მამისათვის არაფერი უკითხავს. ეს ხელმწიფის ბრძანება იყო და არა სადისკუსიო შეთავაზება. მხოლოდ უხმოდ დაუქნია თავი.

დონმა ახლა დისშვილს, ჯოზეფ „პიპი“ დე-ლენას მიმართა, რომელიც საკუთარ შვილებზე არანაკლებად უყვარდა, რადგან სისხლით ნათესაობის გარდა (პიპი მისი გარდაცვლილი დის ერთადერთი ვაჟი იყო), დონი სწორედ მას უმადლოდა მრისხანე სანტადიოზე გამარჯვებას.

- ვეგასში გადახვალ და იქ იცხოვრებ, - უთხრა დონმა, - „ქსანადუში“ ჩვენს წილს მიხედავ. მას შემდეგ, რაც ჩვენი ოჯახი ძირითად საქმეს ჩამოშორდება, აქ ბევრი არაფერი გექნება გასაკეთებელი. ასეა თუ ისე, შენ მაინც ჩვენს მთავარ დამრტყმელ ძალად დარჩები.

პიპის უკმაყოფილება შეატყო, ამიტომ საჭიროდ ჩათვალა მიზეზების დასახელება. 

- შენი ცოლი ნელინი ჩვენი ოჯახის ატმოსფეროს ვერ შეეწყობა, ბრონქსის წრე მას თავისიანად არ მიიღებს, რადგან ის ჩვენგან მეტისმეტად განსხვავდება. ოჯახური ცხოვრება ჩვენგან მოშორებით უნდა მოიწყო, - ეს ყველაფერი კი მართალი იყო, მაგრამ დონს სხვა, უფრო მნიშვნელოვანი მიზეზი ამოძრავებდა: პიპი ოჯახის მხედართმთავარი იყო და, თუკი დონის გარდაცვალების შემდეგაც ბრონქსის წრეში უწინდელ ძალაუფლებას შეინარჩუნებდა, დონის ვაჟები დაიჩაგრებოდნენ. 

- დასავლეთში ჩემს ემისრად გნიშნავ, - განაგრძო დონმა, - იქ გამდიდრდები. გარდა ამისა, იქ მნიშვნელოვანი საქმე გექნება. 

მან პიპის ლას-ვეგასში სახლის შესყიდვის აქტი გადასცა და თავის უმცროს ვაჟს, ოცდახუთი წლის ვინსენტს მიუბრუნდა. ის ყველაზე ტანდაბალი იყო, მაგრამ მკვრივი გახლდათ. ცოტას ლაპარაკობდა და ძალზე გულჩვილი იყო. დედისგან ყველა იტალიური ეროვნული კერძის მომზადება ისწავლა და დედის ნაადრევი გარდაცვალებაც სხვა შვილებზე მწარედ სწორედ მან განიცადა.

- შენი ბედის განსაზღვრას ვაპირებ, - გაუღიმა მამამ, - მინდა, სწორ გზაზე დაგაყენო. ნიუ-იორკში საუკეთესო რესტორანს გახსნი. ხარჯები ნუ შეგაშინებს. მინდა, ფრანგებს დაანახვო, რას ნიშნავს ნამდვილად კარგი საჭმელი, - პიპისა და დანარჩენ ძმებს გაეცინათ, თვით ვინსენტსაც კი გაეღიმა. დონმაც ღიმილით განაგრძო: - ერთი წლით ევროპის საუკეთესო კულინარიულ სასწავლებელში გაგგზავნი.

- მაინც რა უნდა მასწავლონ იქ? - ჩაიბურტყუნა ვინსენტმა, თუმცა კმაყოფილება დაეტყო.

- შენი ნამცხვრები ჯერ კიდევ დასახვეწია, - მკაცრად უთხრა დონმა, - მაგრამ მთავარია, ამ ბიზნესის ფინანსური მხარე შეისწავლო. ვინ იცის, იქნებ ოდესმე რესტორნების ქსელიც გახსნა. ჯორჯო საჭირო თანხას გასესხებს.

ბოლოს დონი პიტის მიუბრუნდა. პიტი მისი მეორე და ყველაზე მხიარული შვილი გახლდათ. ძალზე ლაღი იყო, ოცდაექვსი წლის ასაკში პატარა ბიჭივით იქცეოდა, თუმცა დონი გრძნობდა, რომ ბუნებით სიცილიელ წინაპრებს ჰგავდა. 

- პიტი, - მიმართა მას დონმა, - როცა პიპი დასავლეთში დამკვიდრდება, ბრონქსის წრეს სათავეში შენ ჩაუდგები. ჩვენი კლანისთვის ახალწვეულებს შენ მოამზადებ. გარდა ამისა, შენთვის დიდი სამშენებლო კომპანია შევისყიდე. ნიუ-იორკის ცათამბჯენებს გაარემონტებ, პოლიციის ყაზარმებს ააშენებ, ქალაქში ქუჩებს დააგებ. ეს საიმედო ბიზნესია და მინდა, ეს კომპანა ააყვავო. ის საშუალებას მოგცემს, შენი ჯარისკაცები ლეგალურად დაასაქმო და, ცხადია, ფულსაც მოგიტანს. თავიდან კომპანიის ახლანდელი მფლობელის მეთვალყურეობით